عايز اعرف اللي بيحط فيديو كليب في بروفايله أو ع اليوتيوب بيستفيد ايه ؟ بيتقال عليه روش يعني والا كول والا واد رومانتك ؟! طيب واتقال وبعدين يعني ؟! ايه حصل لو انت محطتش الكليب أو الأغنية أو صورة البنت العسولة اللي شكلها رومانسي ! ولا هيحصل حاجة ! طيب ايه بقى اللي هيحصل لو انت حطيتها ! تعالوا كدا نحسبها بالأرقام !
تخيل مثلا لو 100 شخص بس سمعوا السونجاية اللي انت حاطيتها ! 100 بس مش هنقول الف والا عشرة والا مليون زي ما بنشوف ! 100 واحد شافها عن طريقك !
تخيل الاغنية فيها 100 كلمة بس !
يعني لو افترضنا ان كل واحد سمعها مرة واحدة !
وكل كلمة هيسمعها سيئة واحدة بس !
100 × 100
يبقى انت من كليب واحد أخدت 10000 سيئة في الهوا !
لا تخيل بقى معايا كمان ان واحد حملها !
واللي حملها ده سمعها مرة واتنين وعشرة وعملها سي دي ومشى يسمعها في العربية وبعدين وزع السيدي والسيدي وزعه وهكذا و واحد من اللي خد السونجاية رفعها ع الفيس بوك او منتدى !
تخيل ان كل ده في ميزان سيئاتك وانت نايم ولا داري !
واحد هيقولي يا عم اسلام روق كدا وخليك فريش وبلاش تعمل لنا فيها شيخ !
القضية مش قضية شيخ ولا يحزنون ! القضية قضية عقل شوية
احسبها او احسبيها وقوليلي لو طلعتم بنتيجة غير دي
تخيل انك مت دلوقتي بكرة بعد شهر ! وفضلت صفحة الفيس بتاعتك مفتوحة !
تخيل هتكون ميت ! وكل واحد يسمع انت بتاخد سيئات !
يعني بالبلدي كدا انت لو سمعت اغاني مع نفسك هنقول ماشي سيئاتك هتتوقف اما هتموت ! انما ليه ذنوبك دي تتعدى لغيرك !
يعني مين عاقل يضيع دنيته علشان دنيا غيره ؟!
انت بتبسطهم وبيقولوا عليك الواد والا البنوتة الرومانسية ! وانت اللي بتتحرق بعد كدا بذنوبك !
شوية عقل بس !
يا عم اسلام ماهو الله غفور رحييم !
ايوة ونعم بالله ، الله سبحانه وتعالى غفور رحيم ! والله أيضا شديد العقاب !
القضية مش بنحكم عليها بميزان ولا تقربوا الصلاة ! ويجي واحد يقولنا قرآنكم بيقول بلاش صلاة ! نقول له لأ يا حبيبي كمل الآية
الآية بتقول ولا تقربوا الصلاة وأنتم سكارى !
يا شباب الفيس ، يا بنات الفيس .. يا شباب النت عموما بلااش الذنوب المتعدية دي ! والله أسعد شخص اللي يموت وذنوبه تتوقف عند موته مش يكون ميت وعدد سيئاته شغال !
طيب تخيل بقى لو انت ع النقيض وبتوزع روابط فيها خير .. هتموت وعدد حسناتك هيكون شغال من غير تعب منك !
فكر كدا واحسبها انت .. وقوليلي بجد اللي بينشر فيلم أو فيديو كليب أو اغنية أو حتى صورة بنت بيستفيد ايه ؟! مستني اجابتكم
3 التعليقات:
رائع
جزاك الله خيرا .. بارك الله فيك .. يسلم فمك
زى ما شيخنا الحوينى قال
السيئات الجارية
ربنا يعافينا
إرسال تعليق