أحلى حاجة فينا كشعب مصر إننا شعب مبتكر ، تلاقي عندنا حاجات مش موجودة في الدنيا كلها .. أول ما تسمعها أو تشوفها تلاقي نفسك بتقول "يبقى أنت أكيد في مصر" !
محمدين مثلا ده اسم استحالة إنك تلاقيه في أي مكان في العالم إلا في أم الدنيا ! الناس كلها تعرف محمد واحد مش اتنين !
تلاقي عندك بردو حسنين ! يا جماعة الخير هو حسن واحد بس ايه حسنين دي .. وبردو حمدين –مع الاعتذار لحمدين صباحي- المفروض انه حمدي واحد بس !
أهي نفس القصة دي بقى موجودة بشكل متكرر لغاية ما الثورة اتعدت وهيبقى عندنا ثورتين ! آه والله اصل دي حاجة فريدة في العالم كله :D !
سمعنا عن ثورات كتير لكن أبدا مسمعناش عن مصطلح الثورة التانية دي .. مش بقولكم شعبنا ميزته في الابتكار ، دايما يحب التميّز والانفراد بكل ما هو جديد .. علشان كدا مصر هي أم الدنيا .
المهم بقى بعيدًا عن الكلام ده كله بيقولوا انتَ رأيك ايه في الثورة يا عم إسلام ؟
السؤال ده سمعته اليومين اللي فاتوا يمكن تلاتين خمسين ألف مرّة !
وقبل ما أجاوب في حاجة لذيذة أوي بقت في الإعلام دلوقت ، انك كلما خالفت "النخبة " في حاجة هتاخد كم من الاتهامات المعلبة مخدهاش حرامي في زفة ! يعني مثلا قول نعم للاستفتاء الدستوري هتبقى حمار ! آه والله حمار ومش بتفهم وجاهل .. متنزلش مظاهرة تبقى ابن ستين تيييت وملتفت على الثورة والثوار وفلول نظام وكمان بتخون دم الشهداء ! رغم إن اغلب الشهداء منك لكن بردو بتخونهم .. وهكذا بقى اعمل أي حاجة مخالفة هتبقى اخواني اسرائيلي ايراني امريكي عميل بتاكل من عند مؤمن !
نرجع بقى للسؤال المشروع جدًا .. بس قبل كدا لازم نسأل سؤال هي الثورة دي ليه ؟! يعني ايه أسباب قيامها ! ومين اللي دعى ليها وليه وازاي وكل الكلام ده !
طبعا أغلبكم هيجاوب بسرعة علشان محاكمة مبارك والشلة الـ تيييييت دي ! وطبعا ده كلام غلط ويدل انك مش مستوعب بجد مين اللي دعى ليها ودعى ليها ليه وعلشان ايه !
طيب تعالوا كدا نرجع لنقطة البداية اللي كانت قبل اسبوعين أو أكتر من الآن اللي هي بداية الدعوة للثورة دي .. هنلاقي ان اللي حصل ان السلطات القضائية بدأت تفرج بعض المحسوبين ع الحكومة البائدة بكفالات .. وعليه محدش رضى بكدا وبدأت بعض المطالبات الشابة المشروعة بالثورة التانية !
لحد كدا يا معلم والكلام جميل .. لكن ازاي بقى في ناس كدا دايما بتحب تركب الموجة ! مش السلفيين والله ! لأ بعض ممن يسمون بالنخبة وهنشوف الكلام ده دلوقت ! شوية النخبة دول بقى لاقوا الكلام كدا مش نافع فقاموا وضعوا بعض المطالب الأخرى أهمها
- المطالبة بدستور جديد قبل الانتخابات القادمة !!!
- إزاحة المجلس العسكري من تولي مقاليد الفترة الانتقالية والاتيان بمجلس مدني !!!
- تأجيل الانتخابات البرلمانية والبدء بانتخابات رئاسية قبل ذلك !!!
بدأ بقى النشطاء يكتبوا ويتكلموا عن هذه المطالب ! الست نوّارة نجم مثلا كتبت مقال في جبهة التهييس الشعبية بتهدد الجيش بجمعة 20/5 .. وإنها هتكون قرصة ودان !
غيرها وغيرها من النشطاء والنخبة عبر الإعلام بدأوا يتكلموا عن المطالب دي !
طبعا اما وضعوا المطالب دي كانوا بيظنوا الشارع معاهم ، وفضلوا يحشدوا حشد رهيب علشان الجمعة الفائتة تكون مليونية ! والمطالب كانت صريحة جدا ، سواء في الجروب اللي عملوه علشان كدا ، سواء بالفيديو بتاع أسماء محفوظ اللي قالت ان الجيش مش هو المجلس العسكري ! سواء بمقالاتهم ، أو الفيديوهات اللي عملوها أو المنشورات اللي وزعوها !!
ودي طبعا مش مطالب ده اسمه استهبال ! لأن ولا مطلب من المطالب الجوهرية دي الشعب صوّت عليها في الاستفتاء الأخير ! ولأن مفيش أي حاجة من المطالب دي تلائم ارادة الشعب ! وكمان لأن مفيش حاجة ليها !
يعني عايز أفهم ايه هو المبرر لعمل دستور الآن ؟! ايه في الإعلان الدستوري الحالي اللي لا يناسب إنه ينقلنا من الوضع الانتقالي الحالي لوضع آمن مع برلمان جديد ورئيس جديد !!
ليه مجلس مدني رغم إننا أولا مش عارفين مين هيكون فيه ! ثانيا الناس صوتت على بقاء المجلس المدة دي ! بالرغم من إن النخبة أصلا كانوا عايزيين المجلس العسكري مدة أطول لما قالوا قولوا لا !
وليه رئيس قبل البرلمان !! المنطقي إن البرلمان الأول .. علشان هو اللي هيضع اللجنة الدستورية اللي هتشكل الدستور الجديد اللي هيحدد هيكل البلاد إما ان الحكم هيكون برلماني أو رئاسي أو بين بين !!
طيب اللي حصل بقى بعد كدا بعد يا عيني الحشد الرهيب ده ! اللي حضر كانوا حوالي 3000 فقط ! وهنا النخبة دي أصيب بصدمة عصبية ! لدرجة انهم بدأوا يتخانقوا ويتصارعوا مع بعض !
والبعض منهم طلع أذكى وبدأ يتودد للسلفيين والاخوان ! بعد ما كان السلفيين ولاد ستين تيييت ! الآن السلفيين بقوا لازم ينزلوا علشان ميخنوش دم الشهداء .. ما علينا ..
وآدي مثال يا سيدي لبعض ما يدور في الكواليس من خناقات والكلام كله من ناشطين ليبراليين أو يساريين :
"كل اللف والدوران ويوم نقد المجلس العسكري والاشاعات والاعتصامات والخناقات هدفها مجلس مدني يحكم البلد بدون ماحد ينتخبه. قال يعني الناس حيسكتو"
"أنت متخيل ان مجموعة من "القيادات السياسية" الفاشلة بتاعتنا ممكن تحكم البلد بدون تفويض شعبي وتقدر تعمل خطوة واحدة صح?"
"الناس اللي مش عاوزين المجلس العسكري وفي نفس الوقت بيطالبوا بتأجيل الانتخابات دول حرامية سلطة عاوزين يحكموا البلد بدون صفة"
"طب هو انا قلت ان ده صح؟ولا مجلس مدني دلوقتي ينفع لاسباب كتير ولا ائتلاف الثورة ينفع لان محدش اختاره"
"أنا برد على اللى بيردوا عليك ولسه بيعملوا نفس الكلام ده حتى بيشتموا الشعب انه يبقى جاهل وابن كلب !! نخبة نخبة صحيح"
"اذا كان كل من لم ينزل في مظاهرات يوم الجمعه القادمه هو خائن للثوره ودم الشهداء....فاهلا بالخيانه وانا كبير الخونه في مصر"
"أعجب ممن يهاجمون الإسلاميين في كل شاردة و واردة ثم إذا احتاجوا إلى الحشد سارعوا إلى مطالبتهم بالانضمام إليهم في وجود مطالب غير متفق عليها"
"عادي 77% من الشعب اتضحك عليه وعقابا ليهم مش حناخد رأيهم بعد كدة وحنعمل المجلس الرئاسي غصب عن دين ابوهم هما والجيش"
طبعًا كل الاختلافات دي والمزيد من الصف اليساري والليبرالي نفسه ! لأنهم ببساطة شايفيين إن النخبة بيلعبوا لعبة قذرة !
طيب نيجي بقى للأذكياء اللي فيهم عملوا إيه ! قالك خلاص الشعب مش عايز المطالب دي .. يبقى احنا نعمل مطالب تانية تعجب الشعب ونضحك عليهم آه بقى ما هم جهلة !
ونزلك بشوية مطالب جميلة ومتزوقة كدا ، وست نوارة اتكفلت بكتابتها وطباعتها وتزويعها هي والشباب
ومن المطالب دي
- محاكمة المخلوع وحاشيته والتسريع بذلك .
- حد أدنى للأجور .
- محاكمة الفاسدين ..
زائد شوية مطالب كدا كويسة ..
وطبعا كتير من الشباب بدأوا يعملوا على كدا .. لكن يا ترى احنا نصدق المطالب الأولى والا المطالب التانية اللي هي علشان تعمل حشد للناس ؟!!!
يعني يا اسلام ننزل والا مننزلش بعد العرض ده !!
بصوا يا جماعة بالبلدي كدا فيه مطالب عادلة ، أيوة فيه .. لكن هل هي دي كل المطالب ؟ لأ واللي يقول غير كدا يجيبلي دليله !!
يبقى فيه محاولة للحشد بمطالب جميلة ، وفيه التفاف على إرادة الشعب بشوية استهبال ! طيب انت مش قلت انهم اتراجعوا ؟؟؟؟؟؟
ايوة ده فيما يظهر للناس ! لكن ربنا سبحانه وتعالى لازم يكشفهم ! ولذلك صرح ابراهيم عيسى من يومين إن المطلب الأساسي هو الدستور .. شكرا يا عم ابراهيم ! يعني رغم إعلانكم تجديد المطالب إلا إن النيّة خبيثة ! والكتاب للآن بيكتبوا في كدا ! والنخبة بيتكلموا في كدا .. نقول لهم شكرًا جزيلًا !
يبقى أخيرًا نحن مع المطالب العادلة بلا شك ونحن أصلًا أول المتضررين بها ! خصوصا مطلب الغاء الأمن الوطني الذي عاد بعمل أمن الدولة !
لكننا لسنا مع الثورة الثانية بمطالبها المخفيّة الغير معلنة .. ولذلك لن تتم المشاركة حتى لا يستخدم الزخم الذي سيحدث من المشاركين في تمرير مطالب النخبة المستبدة !!
وبالمناسبة يا ريت يا نخبة تنزلوا الشارع شوية وتسمعوا صوت الشارع انسوا بقى أبراجكم العاجية قليلا !!
وشكرًا
آه نسيت أقولكم إن المقال طويل حبتين اللي مش عنده وقت للقراءة يبقى بلاش :p
